సింగరేణి ఉద్యోగులకు ఎరియర్స్ రూ.1726 కోట్లు చెల్లింపుకు సిద్ధం
* ఒక్కో కార్మికుడికి సగటున రూ.4 లక్షల వరకు ఎరియర్స్
* సింగరేణి డైరెక్టర్(పర్సనల్ ఫైనాన్స్) ఎన్.బలరామ్
మన్యం న్యూస్ భద్రాద్రి కొత్తగూడెం బ్యూరో:
వేజ్ బోర్డు ఎరియర్స్ రూ.1726 కోట్లు చెల్లింపుకు సిద్ధమవుతున్నామని ఒక్కో కార్మికుడికి సగటున రూ.4 లక్షల వరకు ఎరియర్స్ అందనున్నాయని సింగరేణి డైరెక్టర్(పర్సనల్ ఫైనాన్స్) ఎన్.బలరామ్ శుక్రవారం విడుదల చేసిన ఒక ప్రకటనలో తెలిపారు. సింగరేణి కార్మికులకు చెల్లించాల్సి ఉన్న 23 నెలల 11వ వేజ్ బోర్డు బకాయిలను వీలైనంత త్వరగా చెల్లించాలని సంస్థ ఛైర్మన్ మరియు ఎండీ ఎన్.శ్రీధర్ ఆదేశించిన నేపథ్యంలో ఏర్పాట్లు చేస్తున్నట్లు తెలిపారు. ప్రాథమిక అంచనా ప్రకారం రూ.1726 కోట్ల ను బకాయిలుగా చెల్లించనున్నామని సగటున కార్మికుడు సుమారుగా రూ.4 లక్షల వరకు ఎరియర్స్ అందుకుంటాడని డైరెక్టర్ బలరామ్ పేర్కొన్నారు. సింగరేణి చరిత్రలో తొలిసారిగా పెద్దమొత్తంలో వేతన బకాయిలను చెల్లిస్తున్న నేపథ్యంలో ఎటువంటి పొరపాట్లకు అవకాశం లేకుండా ఉండేందుకు వీలుగా నెల రోజుల వ్యవధిలో రెండు విడతలుగా బకాయిలను కార్మికుల ఖాతాల్లో జమ చేయనున్నామని తెలిపారు. వేతన బకాయిల లెక్కింపు ప్రక్రియను అత్యంత పకడ్బందీగా నిర్వహించడానికి పర్సనల్ విభాగం, అకౌంట్స్, ఆడిటింగ్, ఈఆర్పీ, ఎస్ఏపీ, ఐటీ తదితర అన్ని విభాగాల సమన్వయంతో ప్రక్రియ ప్రారంభించామన్నారు. ముందుగా ఉద్యోగుల వేతన ఎరియర్స్ ఆడిటింగ్ ప్రక్రియను అత్యంత వేగంగా పూర్తి చేయాలని అనంతరం ప్రోగ్రామ్ రూపకల్పన కూడా తక్కువ సమయంలో పూర్తి చేసి చెల్లింపులకు మార్గం సుగమం చేయాలని సంబంధిత శాఖల అధికారులకు ఆదేశాలు జారీ చేసినట్లు తెలిపారు. ఏ దశలోనూ జాప్యం జరగరాదని స్పష్టం చేశారు. నెలరోజులలోపు చెల్లించాలని ప్రాథమికంగా అనుకుంటున్నప్పటికీ అంతకన్నా ముందే చెల్లించడం కోసం కృషి చేస్తున్నామని పేర్కొన్నారు.
11వ వేజ్ బోర్డు ను వేతనాలను అందరికన్నా ముందే సింగరేణిలో అమలు జరిపామని, ఈ మేరకు కంపెనీకి ఏడాదికి సుమారు రూ.1200 కోట్ల అదనపు వ్యయం అవుతోందని దీనితోపాటు ప్రస్తుతం చెల్లించే ఎరియర్స్ రూ.1726 కోట్లతో కలిపి మొత్తం దాదాపు 3 వేల కోట్ల చెల్లింపులను చేయనుందని పేర్కొన్నారు. ఈ బకాయిలను ప్రస్తుతం ఉద్యోగంలో ఉన్న కార్మికులకు చెల్లిస్తున్నామని పదవీ విరమణ చేసిన కార్మికులకు త్వరలో చెల్లిస్తామన్నారు.
