హనుమాన్’ మూవీతో బ్లాక్ బస్టర్ హిట్ అందుకున్నాడు దర్శకుడు ప్రశాంత్ వర్మ. ఈ మూవీతో ఆయన పేరు ప్రతీ భాషలోనూ మారుమోగిపోతోంది. కేవలం రూ.40 కోట్ల బడ్జెట్‌తో సినిమాను తెరకెక్కించి దాదాపు రూ.250 కోట్లకు పైగా కలెక్షన్స్ వచ్చేలా చేశాడు. ఆయన క్రియేటివిటీకి సినీ ప్రియులు మంత్రముగ్దులయ్యారు. సినిమా వీక్షించినవారంతా.. ఇంత చిన్న బడ్జెట్‌లో వండర్‌ ఫుల్‌గా గ్రాఫిక్స్ ఎలా తీయగలిగారు అంటూ ప్రశాంత్‌పై ప్రశంసలు కురిపిస్తున్నారు.
దీంతో అతడి చేతిలో ఏదో తెలియని మేజిక్ ఉందని.. దానిని క్యాష్ చేసుకునేందుకు చాలా మంది చూస్తున్నారని తెలుస్తోంది. ఇందులో భాగంగానే ఇప్పుడు ఆయన వద్దకు చాలా ఆఫర్లు వచ్చిపడుతున్నాయి. వంద, రెండు వందల కోట్ల బడ్జెట్ పెట్టి ఆయనతో సినిమా తీయాలని చూస్తున్నారట. ఇలాంటి సమయంలోనే ఎవరూ ఊహించని ఒక ఆఫర్ ఆయన వద్దకు వచ్చినట్లు తెలుస్తోంది.
సినిమా తీస్తే వెయ్యి కోట్ల బడ్జెట్ పెడతానంటూ దర్శకుడు ప్రశాంత్‌కు ఓ ఆఫర్ వచ్చిందట. ఈ విషయాన్ని అతడే స్వయంగా బయటపెట్టాడు. తాజాగా ఓ ఇంటర్వ్యూలో పాల్గొన్న అతడు మాట్లాడుతూ.. తనకు వంద కోట్లు, రెండు వందల కోట్లు ఆఫర్లు ఉన్నాయని అన్నాడు. అయితే మొన్న ఒక వ్యక్తి ఏకంగా వెయ్యి కోట్లు ఆఫర్ చేశారని తెలిపాడు. హనుమాన్ మూవీ చూసిన ఓ ఎన్నారై వైద్యుడు తనకు ఈ ఆఫర్ ఇచ్చినట్లు చెప్పాడు. ‘‘మన ఇతిహాసాన్ని ఇలా చెబితే కనుక రేపు పొద్దునే వెయ్యి కోట్లు పంపిస్తాను.. సినిమా చేయమని ఆఫర్ ఇచ్చారు’’ అని తెలిపాడు.
అయితే ఇక్కడ ఎంత పెడుతున్నామో ముఖ్యం కాదని.. పెట్టిన పెట్టుబడికి క్వాలిటీ చూపించామా లేదా అనేదే ముఖ్యం అని అన్నాడు. ఈ మేరకు తనకు రూ.30 కోట్ల బడ్జెట్ ఇస్తే.. దాన్ని రూ.50 కోట్ల సినిమాగా మలుస్తానని.. రూ.50 కోట్ల బడ్జెట్ ఇస్తే.. రూ.100 కోట్ల బడ్జెట్ సినిమాగా తయారుచేస్తానని ప్రశాంత్ అంటున్నాడు.
