సీఐడీ… క్రైమ్ అండ్ సస్పెన్స్ నేపథ్యంలో బుల్లితెరపై ఓ సంచలనం దాదాపు 21 ఏళ్లపాటు ప్రేక్షకుల హృదయాలను గెలుచుకుంది. హిందీలో వచ్చిన ఈ క్రైమ్ సిరీస్ తెలుగులోనూ డబ్ అయి సక్సెస్ అయ్యింది. అయితే ఈ సీరియల్కు సామాన్యులే కాదు.. సెలబ్రెటీలు కూడా అభిమానులున్నంటే అతిశయోక్తి కాదు. అత్యంత ప్రేక్షకాదరణ సొంతం చేసుకున్న ఈ సీరియల్ 2018లో ముగిసింది.
ఆ తర్వాత మళ్లీ ఎప్పుడు మొదలవుతుందా అని ఎదురుచూస్తున్న ఫ్యాన్స్ కు ఓ గుడ్ న్యూస్ వచ్చినట్టే అనిపిస్తోంది. ఈ సిరీస్ మళ్లీ ప్రారంభమవుతుందంటూ వార్తలు వినిపిస్తున్నాయి. దీనికి కారణం సీఐడీలో ఏసీపీ ప్రద్యుమన్ గా అలరించిన శివాజీ షేర్ చేసిన ఫొటోనేనని తెలుస్తోంది. శివాజీ ఇన్ స్టాగ్రామ్ లో షేర్ చేసిన ఈ ఫొటోలో ఇన్ స్పెక్టర్ దయా, ఇన్పెక్టర్ అభిజిత్ పాత్రల నటులతో పాటు ఈ సిరీస్ సృష్టికర్త బీపీ సింగ్ కూడా ఆ ఫోటోలో కనిపిస్తున్నారు. ఈ ఫొటోకు పెదనాన్న బీపీతో గ్యాంగ్ ఆఫ్ సీఐడీ అనే క్యాప్షన్ ఇచ్చారు. ప్రస్తుతం ఈ ఫొటో నెట్టింట్లో వైరల్ గా మారింది. దీంతో మళ్లీ సీఐడీ స్టార్ట్ అవుతుందంటూ ప్రచారం సాగుతోంది. కానీ దీనిపై అధికారిక ప్రకటన మాత్రం ఏమీ వెలువడలేదు.
