కథానాయిక హన్సిక కొత్త జీవితంలోకి అడుగుపెట్టింది. ప్రియుడు సొహైల్ కతురియాతో ఏడడుగులు వేసింది. ఆదివారం జైపూర్‌లోని ముందోతా ఫోర్ట్ ప్యాలెస్‌లో హన్సిక, సొహైల్ పెళ్లి వైభవంగా జరిగింది.పెళ్లి వేడుకలకు సంబంధించిన ఫొటోలు, వీడియోలు సోషల్ మీడియాలో వైరల్‌గా మారాయి. పెళ్తిదుస్తుల్లో హన్సిక మెరిసిపోతూ కనిపించింది. హన్సిక, సొహైల్ పెళ్లికి కుటుంబసభ్యులు, సన్నిహితులతో పాటు కొద్ది మంది అతిథులు మాత్రమే హాజరయ్యారు. పెళ్లికి ముందు నుంచే చాలా కాలంగా సొహైల్‌తో హన్సికకు పరిచయం ఉంది. రెండేళ్లుగా హన్సిక అతడితో ప్రేమలో ఉన్నట్లు చెబుతున్నారు. ఇన్నాళ్లు ప్రేమ విషయాన్ని రహస్యంగా దాచిన హన్సిక ఇటీవలే సొహైల్‌కు ఈఫిల్ టవర్ ముందు లవ్‌ను ప్రపోజ్ చేసిన ఫొటోలను ఇన్‌స్టాగ్రామ్‌లో పోస్ట్ చేసింది.
త్వరలోనే అతడిని పెళ్లి చేసుకోబోతున్నట్లు ప్రకటించింది. హన్సికకు ఇది మొదటి వివాహం కాగా సొహైల్‌కు మాత్రం ఇది రెండోది. గతంలో హన్సిక స్నేహితురాలు రింకీ బజాజ్‌ను సొహైల్ పెళ్లిచేసుకున్నారు. మనస్ఫర్థలతో ఆమె నుంచి విడాకులు తీసుకున్నాడు. సొహైల్, రింకీ బజాజ్ పెళ్లికి హన్సిక హాజరైన పాత వీడియోలు, ఫొటోలు సోషల్ మీడియాలో చక్కర్లు కొడుతున్నాయి. అల్లు అర్జున్ హీరోగా పూరి జగన్నాథ్ దర్శకత్వంలో రూపొందిన దేశముదురు సినిమాతో టాలీవుడ్‌లోకి ఎంట్రీ ఇచ్చింది హన్సిక. కందిరీగ, బిల్లా, దేనికైనా రెడీతో పాటు పలు తెలుగు సినిమాల్లో గ్లామర్ ప్రధాన పాత్రల్లో నటించింది. తమిళంతో అగ్ర హీరోయిన్లలో ఒకరిగా పేరుతెచ్చుకున్నది. ప్రస్తుతం తెలుగు, తమిళ భాషల్లో ఆరు సినిమాలు చేస్తోంది.
